TABOLEIROS MATEMÁTICOS

 O taboleiro matemático é un medio divulgativo das matemáticas. Trátase de contextualizar esta disciplina segundo as diferentes épocas do curso. Os temas tratados foron:

• Arte e matemáticas.

• Samaín: origami e ilusións ópticas.

• Nadal: matemáticas con papel.

• Ilusións ópticas: unha nova perspectiva.

• En torno ao Día Pi.

• Flores matemáticas: a beleza das funcións.

COLOCACIÓN DA CASIÑA DE PAXAROS INTELIXENTE NO EXTERIOR

O Club de Ciencias, unha vez rematada a instalación dos equipos necesarios na casiña de paxaros, levou a cabo unha actividade de colocación da casiña no exterior para observar se se producía a aniñación dalgún paxaro. Entre as posibles localizacións, deciciuse colocar cara o nacente e a unha altura que rolda os 2 metros para evitar o ataque de depredadores.

Nas imaxes que figuran a continuación pódense observar o resultado dos pasos seguidos polo alumnado nas reunións do Club de Ciencia. 

O alumnado amosouse entusiamado ante a perspectiva de ver algún paxaro formar o seu niño na casiña e de telo no Centro.

XORNADA FORMATIVA NA EGAP: "A CIENCIA QUE NOS UNE"

Hoxe, a profesora de Física e Química pertencente o Club de Ciencia, participou na I Xornada de Redes de Clubs de Ciencia “A ciencia que nos une”, celebrada na EGAP en Santiago de Compostela, un encontro para compartir experiencias, crear conexións e seguir impulsando a ciencia nos centros educativos galegos a través do traballo en rede.

Estas xornadas supoñen unha oportunidade moi valiosa para o profesorado, xa que permiten compartir experiencias, acceder a novos recursos e seguir fomentando a curiosidade, a innovación e o pensamento científico nas aulas.

CIENCIA DA RÚA DE BAIO

 

Hoxe pola mañá celebrouse no polideportivo de Baio o I Día da Ciencia na Rúa, unha iniciativa organizada polo IES Maximino Romero de Lema que reuniu alumnado e profesorado de distintos centros da contorna.

Ao longo da xornada participaron máis de 530 alumnos e alumnas procedentes de 8 centros educativos de primaria, secundaria e educación especial, que puideron desfrutar dunha ampla variedade de postos con experimentos científicos e propostas matemáticas. A actividade permitiu achegar a ciencia dun xeito práctico, participativo e divertido, fomentando a curiosidade e o interese polo coñecemento.

Foi unha mañá de aprendizaxe compartido, na que o alumnado puido experimentar, observar e descubrir diferentes fenómenos científicos a través de actividades dinámicas e adaptadas a todas as idades.

Queremos agradecer a participación de todos os centros educativos asistentes, así como a colaboración do Concello de Zas, cuxo apoio foi fundamental para poder levar a cabo esta xornada de divulgación científica.

Dada a gran acollida, o interese amosado e o carácter tan enriquecedor da experiencia, temos claro que esta actividade terá continuidade e repetiremos a iniciativa no vindeiro curso.

OBRADOIRO SOBRE O MAR DE ARDORA NA COSTA DA MORTE

 

O alumnado de 1º de Bacharelato participou nun interesante obradoiro impartido por Drew Korme centrado no fenómeno do Mar de Ardora na Costa da Morte.

Ao longo da sesión, o alumnado puido achegarse a este espectacular fenómeno natural que ilumina o mar durante a noite grazas á bioluminiscencia de determinados microorganismos mariños. A través de explicacións, imaxes e experiencias compartidas por Drew Korme, coñeceron mellor as características deste fenómeno tan singular e a importancia ambiental e científica que ten para a nosa costa.

O obradoiro serviu tamén para poñer en valor a riqueza natural da Costa da Morte e para fomentar a curiosidade, a observación e o interese pola ciencia e pola natureza entre o alumnado.

Foi unha actividade moi enriquecedora e inspiradora que permitiu aprender dun xeito próximo e dinámico sobre un dos fenómenos máis fascinantes do noso entorno.

XORNADA CIENTÍFICA SOBRE O ECLIPSE SOLAR

 O alumnado de 3º da ESO e 1º de FP Básica prepárase para o eclipse solar cunha xornada científica con Óscar Blanco.

Durante toda a mañá do mércores, o alumnado de 3º da ESO e de 1º de FP Básica participou nunha completa actividade científica impartida por Óscar Blanco, centrada nas eclipses totais de Sol.

A primeira parte da xornada consistiu nunha charla divulgativa na que se explicou que son as eclipses solares, como se producen e por que se consideran unha auténtica “coincidencia cósmica” pola precisión coa que se aliñan Sol, Lúa e Terra.

Na segunda parte, o alumnado participou nun obradoiro práctico no que construíron aparellos de observación de eclipses, aprendendo a súa utilidade e o seu funcionamento de forma segura.

Esta actividade serviu tamén como preparación para o próximo eclipse solar, achegando ao alumnado coñecementos e recursos para poder observalo de maneira correcta e segura, espertando ao mesmo tempo o interese pola astronomía.

Unha mañá moi completa que combinou divulgación científica e práctica, espertando a curiosidade e o entusiasmo polo universo.

CAMBIO CLIMÁTICO

 

O alumnado de 1º de Bacharelato iniciou a xornada do mércores cunha interesante charla impartida por Xavier Fonseca, xornalista científico e divulgador especializado en meteoroloxía e cambio climático.

Baixo o título “Desinformación: un problema para abordar a crise climática”, o relator convidou ao alumnado a reflexionar sobre o impacto das fake news e da información manipulada na percepción social dos problemas ambientais, así como na toma de decisións informadas.

Durante a sesión, Xavier Fonseca compartiu tamén a súa experiencia profesional e persoal, destacando a súa viaxe á Antártida, onde puido observar de primeira man os efectos do cambio climático nun dos ecosistemas máis sensibles do planeta.

A actividade resultou moi enriquecedora, fomentando o pensamento crítico e a conciencia ambiental entre o alumnado, especialmente nun contexto no que a información veraz é clave para afrontar os retos do futuro.

Unha excelente maneira de comezar a xornada cunha reflexión sobre ciencia, información e responsabilidade social.