FOTOGRAFÍA PAISAXÍSTICA
O encargado de realizalo foi un alumno do Centro, o cormelán Andrés García, máis coñecido por Drew Korme e gañador do certame internacional Milky Way Contest a web 35 Awards grazas a unha imaxe da Vía Láctea sobre o faro Roncudo e enriba da máxica Mar de Ardora.
Iniciaron o obradoiro cunha andaina pola fermosa paisaxe que hai desde o Centro ata a Carballeira de Baio; polo camiño xa lles foi ensinando diferentes técnicas de fotografía e como potenciar o uso do teléfono móbil para realizar fotos excelentes da natureza.
Explicou as técnicas da regra dos 3 terzos, a técnica do macro e a do enfoque próximo á natureza. Despois da descrición de cada técnica, o alumnado contaba con quince minutos aproximadamente para poñela en práctica e preguntar dúbidas. Rapaces e rapazas quedaron entusiasmados/as co obradoiro e déronse conta por primeira vez de que se podía observar a natureza dun xeito diferente, máis alá de ser unha idílica paisaxe pola que pasea.
