CONCURSO INSPIRACIENCIA. CATEGORÍA PREMIO DE DANZA 2025-2026

Neste vídeo no que participou o alumnado de 4º ESO e 1º Bacharelato, recóllese a evolución histórica dos diferentes modelos atómicos ao longo dos últimos cen anos. O vídeo parte do Modelo de Thomson que seguido do de Rutherford e o de Bohr remata co modelo Mecanocuántico actual.  A música e os traxes tradicionais que o acompañan e que empregou o alumnado, permiten a fusión da Danza coas Ciencias así como a compartición da cultura da nosa terra. Este vídeo vai dirixido á categoría do premio especial de danza do concurso Inspiraciencia correspondente ao curso 2025-2026.

Reunión Club Ciencia proxecto de montaxe e instalación dunha casa de paxaros intelixente

A NOSA CASIÑA DE PAXAROS INTELIXENTE

Hoxe, 16 de marzo o alumnado do club de Ciencia dos cursos de 3º e 4º ESO paticipou nun dos proxectos do Club de Ciencia para este curso é crear a nosa casiña de paxaros intelixente. A nosa idea é ter unha cámara que capture fotos dos nosos hóspedes ou ben permita ver en directo o que está a suceder na casiña.

Xa dispoñemos da estrutura da casiña, feita en reunións anteriores do Club de Ciencia. A sesión comeza dándolle voltas ao maxín; o alumnado pon en común que material necesitamos para o noso proxecto. Despois duns minutos de debate, xa temos a lista da compra: un microcontrolador que incorpora cámara (ESP32Cam), unha batería para alimentar o dispositivo, un panel solar para cargar a batería e un router 5G para ter acceso á cámara por Internet.

Unha vez que temos claros os materiais, toca poñerse mans á obra. Seguindo as instrucións do profesorado, o alumnado dividiuse en dous grupos para montar o sistema. Tras verificar que todo estaba ben conectado, procederon a cargar un sinxelo programa de vídeo en liña no microcontrolador. Comprobaron que o sistema funcionaba correctamente: eramos capaces de ver a imaxe en vivo a través da cámara desde un navegador de Internet nun ordenador.

Unha vez que tiñan todo listo, cada grupo pensou na súa proposta para integrar os elementos na casiña. A premisa é captar unha boa imaxe do interior sen perturbar o descanso dos nosos hóspedes.

Xa temos todo listo! Soamente queda elixir a árbore onde colocaremos a casiña e esperar ao primeiro visitante… será un pardal, un xílgaro... que nervios!

Reunión Club Ciencia IA

INTELIXENCIA ARTIFICIAL PARA ENTENDER O MUNDO

O pasado encontro do Clube de Ciencias do IES Maximino Romero de Lema contou coa participación do alumnado de 2º da ESO nunha sesión dedicada a descubrir, dunha forma práctica e amena, os fundamentos da Intelixencia Artificial.

Durante a xornada, o alumnado tivo a oportunidade de traballar con Teachable Machine, unha ferramenta de Google que permite achegarse ao concepto de Machine Learning de xeito sinxelo e visual. A actividade consistiu en crear clases para a separación do lixo, ensinando á máquina a distinguir diferentes residuos e asignalos ao colector correspondente. Unha forma moi efectiva de combinar conciencia ambiental e tecnoloxía.

Pero a sesión non ficou aí. Tamén se exploraron outros conceptos clave da IA a través de propostas lúdicas: as árbores de decisión explicáronse da man do popular xogo Akinator, que con preguntas sucesivas é capaz de adiviñar calquera personaxe; e as redes neuronais descubríronse mediante Quick, Draw!, a ferramenta de Google que aprende a recoñecer debuxos feitos a man alzada.

O resultado foi un encontro moi didáctico e distendido, no que o alumnado puido comprender, sen darse case conta, como funcionan algúns dos sistemas de intelixencia artificial que forman parte do noso día a día.

PROXECTO MULLERES CIENTÍFICAS

MURAL DE MULLERES CIENTÍFICAS

O alumnado de FPB II, formado por Valentín, Soraya, Aarón e Antía, participou nun interesante proxecto de investigación sobre as mulleres científicas, contando coa colaboración do Club de Ciencias, o Equipo de Dinamización da Lingüística e a Biblioteca do centro.

Esta actividade desenvolveuse co obxectivo de achegar referentes femininos no ámbito científico ao alumnado, coincidindo coa conmemoración do Día da Muller Traballadora. A tarefa principal consistiu na elaboración dun mural dedicado a diferentes mulleres científicas que marcaron a historia da ciencia.

Nunha primeira fase, o alumnado realizou un traballo de busca e selección de información sobre 19 mulleres científicas, destacando para cada unha delas unha imaxe representativa e unha frase célebre. Posteriormente, elaboraron as correspondentes fichas informativas que foron expostas na entrada do centro educativo.

Como complemento á exposición, tamén deseñaron un xogo electrónico relacionado co contido traballado, permitindo así que toda a comunidade educativa puidese interactuar e ampliar coñecementos dun xeito dinámico e atractivo.

Sen dúbida, foi unha actividade moi motivadora que contribuíu a espertar a curiosidade e o interese por estas figuras tan relevantes na historia da ciencia.

Noraboa polo excelente traballo realizado!