OBRADOIRO DE CIANOTIPIA

                No Club de Ciencia estamos moi activos durante a Semana Cultura deste curso, por iso propuxemos moitas das actividades. Unha delas foi a de iniciar o alumnado de  1º Bacharelato na técnica fotográfica da cianotipia e a encargada de levala a cabo foi Sol Mariño, unha artista que fusiona fotografía, debuxo e pintura.A cianotipia foi unha técnica xurdida no século XX con múltiples usos en creacións contemporáneas. 

                O obradoiro combinou unha aproximación ás orixes da cianotipia coa súa posta en práctica, consistente na realización de impresións a partir do seu revelado ao sol en ton azul prusia das composicións realizadas polo alumnado con materia natural da contorna, plantas e algas que lles proporcionou Sol.

              O alumnado realmente gozou con todo o proceso que lles permitiu achegarse ao proceso fotográfico que nada ten que ver co que eles coñecen e usan cada día cos seus móbiles.

 

 

HÁBITOS SAUDABLES NA ALIMENTACIÓN

             Noa Vázquez, Asesora nutricional, foi a encargada de dar un obradoiro sobre hábitos saudables na alimentación ao alumnado de 2º da ESO.

            Segundo Noa achegaba información sobre como debería ser unha correcta alimentación (menos cantidade de orixe animal, mestura de cereais con legumes, consumo de cereais integrais, evitar as comidas elaboradas con graxas creadas no laboratorio e incorporar graxas sans, inxerir alimentos frescos...) o alumnado tiña que ir creando a súa propia pauta nutricional para unha semana seguindo as orientacións que a relatora lles ía dando. Amosou a súa planificación semanal para que lles servise de modelo.

            Para finalizar compartiu varias receitas sans e orixinais: barriñas de muesli, brownie de garavanzos, sopa de quinoa e cabaza, porridge e, torta de agar-agar e froitas.

            Todo o alumnado saíu coa súa pauta nutricional personalizada e adaptada aos gustos de cada un/unha para unha semana e, ademais con receitas que poden preparar na casa e así sorprender a súa familia con alimentos innovadores e sans ao mesmo tempo.