Coñecendo as árbores do noso bosque

 

 

    A última actividade do Club de Ciencias deste curso académico foi a realizada polo alumnado de 1ºESO no bosque do noso Centro. Realizaron un percorrido polo mesmo observando as árbores; cos móbiles ían recollendo a información nos códigos QR dos 20 paneis informativos que hai e nos que ademais do código QR tamén consta o nome científico e en galego da árbores, e unha ilustración da árbore en cuestión. O alumnado tiña que responder un cuestionario elaborado dende o Club de Ciencia. Cos móbiles accederon a información máis detallada sobre cada unha das árbores, os seus usos e a poemas que lle dedicaron escritores galegos.   

Unha actividade que lles obriga a fixarse na natureza da contorna e que resulta amena e pedagóxica.

Clausura e entrega de diplomas

 

Hoxe 19 de xuño despedimos o curso académico no Club de Ciencia compartindo unha merenda no recreo e facendo entrega dos Diplomas de Aproveitamento do Club de Ciencias a todo o alumnado que participou activamente no mesmo. Foron as profesoras Begoña e Luchy as encargadas de darlles o título que encheu de satisfacción aos e ás participantes que durante moitos luns se reuniron para aprender e desenvolver Ciencia. 

Parabéns a todos e todas e esperamos que no novo curso escolar se unan máis membros!

CIQUS. Museo de Historia Natural

          Hoxe o alumnado de 4º ESO e o de FPBI tiveron unha xornada intensa visitando o CIQUS e o Museo de Historia Natural en Santiago de Compostela. Na visita ao CIQUS puideron coñecer onde traballan os investigadores e os equipos que utilizan para as súas investigacións científicas. Ademais fixéronlles unha exhibición de reaccións químicas moi interesantes coma, por exemplo, a formación de polímeros como o nylon ou de “blandiblú” ou slime. No Museo de Historia Natural o alumando superou o reto de identificar os animais que lles propuxeron coa axuda dun formulario de preguntas. Tamén a través da visita guiada, aprenderon sobre a biodiversidade e os minerais e rochas presentes na natureza.
  Unha xornada moi amena e didáctica que todos e todas gozaron.

Recreos científicos

             Unha forma de promocionar o Club de Ciencias é continuar nos recreos con actividades que se realizan nas xuntanzas dos luns. Por este motivo durante varios recreos do último mes integrantes do Club continuaron traballando coa resina para amosarlles ao resto do alumnado o divertido á vez que pedagóxico é pertencer ao Club de Ciencias!

Taller de imaxes 3D

        Hoxe luns na reunión do Club de Ciencia o alumnado tivo a oportunidade de participar nun taller de imaxes 3D. Primeiro visualizaron vídeos con imaxes 3D e utilizando as súas gafas 3D e despois crearon imaxes 3D a partir de fotografías. Encantoulles a actividades a todos e todas!

Taboleiro Matemático. Anaglifos

 

     Despedimos o taboleiro matemático con anaglifos: imaxes de dúas dimensións capaces de provocar un efecto tridimensional cando se ven con lentes especiais (lentes de cor diferente para cada ollo). Baséase no fenómeno da visión binocular e foi patentado por Louis Ducos du Hauron no 1891. As imaxes de anagrifo compóñense de dúas capas de cor superimpostas pero movidas lixeiramente unha con respecto á outra para producir o efecto de profundidade. Usualmente, o obxecto principal está no centro, mentres que a de arredor e o fondo están movidos lateralmente en direccións opostas. A imaxe contén dúas imaxes filtradas por color, unha para cada ollo. Cando se ve a través das gafas anaglifo, revelarase unha imaxe tridimensional. A corteza visual do cerebro fusiona isto dentro da percepción dunha escena con profundidade.

Proxecto Maximeter

  

 

MAKER FAIRE GALICIA!

        Unha edición máis participamos nas xornadas educativas da Maker Faire Galicia, celebradas na Cidade da Cultura (Santiago) hoxe pola mañá. En representación do centro acudiu alumnado de 1º curso do ciclo medio de Sistemas Microinformáticos e Redes, acompañados polo profesorado Marta Diz, Fina Paulos e Óscar Rey. O alumnado encargouse de explicar o proxecto aos asistentes. Un traballo fantástico, parabéns para Marcos Castro, Daniel Dopazo, Adrián Negreira e Cristina Rial.

        Seguimos traballando en proxectos de utilidade na nosa vida cotiá, no eido persoal e laboral. Nesta edición presentamos o proxecto Maximeter, un sistema centralizado para a medición de condicións climáticas nun espazo físico, por exemplo un invernadoiro. O proxecto conta cunha aplicación web onde poder consultar en tempo real as condicións atmosféricas, así como as medicións históricas.

        O dispositivo presentado xa ten destinatario, o Centro de Formación y Experimentación Agraria de Monforte de Lemos. No vindeiro curso, acudiremos co alumando a coñecer o centro e deixar instalado o Maximeter para que poidan controlar a temperatura, humidade e presión atmosférica no seu invernadoiro.

        O proxecto desenvólvese dentro do Club de Ciencia, encaixa dentro das liñas de traballo do centro para potenciar as capacidades STEM do noso alumnado. 

    O proxecto tivo boa acollida, hai máis centros interesados en contar cun Maximeter ;).

Somos makers!