Exposición sobre aves mariñas

Compañeiras do mar e do ceo

Este é o título da exposición itinerante que temos estes días no noso Centro e na que a través de seis paneis, se divulga e se pon en valor a importancia da conservación das aves mariñas, como están intimamente ligadas co mar, xa que dependen deste para sobrevivir, así como a súa relación coas actividades pesqueiras. Tamén se destaca Galicia como un lugar clave para a reprodución de certas aves mariñas xa que conta con cinco Zonas de Especial Protección para as Aves das trinta e nove que hai en España.

É importante concienciar o noso alumnado de que as aves son imprescindibles para o medio ambiente, xa que cumpren funcións únicas que non realizan todas as especies de animais. Sen elas poderiamos entrar nun rápido declive social social porque as enfermidades e pragas que se poden xerar son inimaxinables.  Con esta mostra queremos contribuír a que todos e todas protexamos as aves que viven na nosa contorna ou que están de paso, posto que o noso mar é fundamental na ruta migratoria de moitas especies atlánticas. Por iso os distintos grupos visitarana cunha guía do Club de Ciencia para o seu maior aproveitamento. Velaquí tendes fotos da visita de 1º de ESO.

A exposición foi cedida ao Club de Ciencia polo CEIDA (Centro de Extensión Universitaria e Divulgación Ambiental de Galicia) que promove a educación ambiental en todos os sectores sociais.

Xogos de mesa reciclados

 

O Club de Ciencia colaborou unha vez máis co Equipo da Biblioteca por unha boa causa: a organización dun obradoiro de xogos de mesa reciclados dirixido ao alumnado de 1º de ESO  para conmemorar o Día da Non Violencia e da Paz.

Deseñaron con chapas, tapóns de plástico, vellas camisetas e cartóns, taboleiros de xogos de tres en raia e das damas coas respectivas fichas; decoraron todo con motivos en defensa da Paz. Ao rematar puideron xogar unhas partidas en total harmonía. Durante os recreos foron moitos e moitas os/as que se apuntaron a botar unha partida.  Que mellor xeito de dar unha nova vida a eses materiais!

Reciclaxe de pilas

            Por segundo ano participamos no Concurso Pilabot co obxectivo de realizar unha recollida selectiva de pilas para reciclar e protexer o medio ambiente minimizando a contaminación xerada polos residuos de pilas á vez que podemos gañar un premio. Por iso vos animamos, unha vez máis, a que traiades dos vosos fogares todas as pilas usadas que atopedes e así facer do noso Centro un centro ecolóxico.          

             Xa repartimos cadanseu contedor entre todos os membros da Comunidade Escolar e agora sodes vós os protagonistas, enchéndoos e depositando as pilas no colector que hai na entrada xunto a conserxería. Lembrade que o centro que máis pilas xunte, máis oportunidades de gañar premio terá.

            

Cociña molecular

             Hoxe na reunión do Club de Ciencias elaborouse falso caviar con diferentes produtos  (iogur, zume, infusión, batido de cacao...). Empregando agar-agar como xelificante conseguimos unha textura adecuada e cun contraste térmico fomos capaces de formar boliñas que forman o noso caviar. Unha vez rematada a súa elaboración, levouse a cabo a súa cata para valorar os diferentes sabores.

Nadal de aproveitamento

     Dende o Club de Ciencia, co gallo das numerosas reunións que temos arredor da comida en Nadal, quixemos achegarnos a un problema de dimensións alarmantes: os residuos alimenticios.

    Os residuos alimenticios fan referencia a aqueles alimentos seguros e nutritivos para o consumo humano que son rexeitados e perdidos ao longo da cadea de subministro alimentario: dende a produción inicial ata o consumo final nos fogares. É necesario reducilos polas consecuencias sociais, medioambientais e económicas que teñen. Por iso un grupo de alumnos e alumnas fixeron exposición explicativas do problema ante os/as compañeiros/as antes do Nadal e durante o mesmo elaboraron receitas para aproveitar as sobras. O vídeo de arriba resume esta iniciativa.

Fonte de Heron con material reciclado

 Os alumnos e alumnas de 1º de FP Básica aproveitaron o estudo dos tipos de enerxía para fabricar unha fonte que funciona sen necesidade de empregar ningún motor nin enerxía eléctrica: a fonte de Herón. Con esta actividade démoslle unha nova vida a todas esas botellas de plástico que usamos diariamente ao tempo que aprendemos un pouco sobre o comportamento dos fluídos.

A síntese do primeiro polímero totalmente sintético, a baquelita, por parte do estadounidense Leo Baekeland alá polo 1907 supuxo unha revolución no mundo dos materiais, pois foron os cimentos a partir dos cales se iniciou toda a investigación de novos polímeros. Este polímero contaba con propiedades tan interesantes como que era illante da electricidade, químicamente inerte, moldeable e fácilmente tinguible, polo que a súa aplicabilidade na construción de carcasas de electrodomésticos ou enchufes mellorou significativamente a calidade de vida da sociedade do momento. A partir de aí, logo comezarían a xurdir novos materiais poliméricos máis versátiles, con múltiples utilidades, como son o poliéster, o PVC, o nailon, o poliuretano ou o teflón. 

Desafortunadamente, a produción masiva de plásticos ten tamén unha cara menos amable: a contaminación. Esta débese fundamentalmente a que ás técnicas de xestión e tratamento dos residuos plásticos aínda lle falta moito por desenvolver. Na retina de todos está a imaxe da isla de lixo ao norte do Océano Pacífico onde os residuos se expanden por 1,6 millóns de Km² (casi tres veces o tamaño de Francia) ou as noticias que aparecen día tras día nos medios de comunicación nas que os expertos nos advirten de microplásticos presentes no peixe que comemos.

Tendo en conta que cada minuto se compran un millón de botellas de plástico, e que en España soamente se recicla o 11% dos residuos plásticos, é preciso concienciar ao alumnado da necesidade da reciclaxe. De aí que o alumnado de 1º de FPB decidise poñerse mans á obra e crear a fonte de Herón que podestes ver no vídeo de arriba, proxecto no que se conxuga estudo das enerxías, reciclaxe, curiosidade e bo facer por parte de Mar, Sheila, Kevin, Fabián, Leo e Omar.