LAPISEIROS 100% RECICLADOS E OBRADOIRO DE ORIGAMI
Na última xuntanza do Club fixeramos lapiseiros con material reciclado e, na sesión de hoxe personalizámolos de maneira que cada alumno/a tivo a oportunidade de demostrar a súa creatividade. Velaquí tedes fotos das creacións artísticas finalizadas.
Como sobrou tempo aproveitamos para practicar origami e realizar corazóns de papel nun día tan sinalado coma hoxe.😀
A CIENCIA É FEMININO
PODEMOS CONSTRUÍR DE XEITO SUSTENTABLE?
Co motivo do 11 de febreiro, Día Internacional da Muller e a Nena na Ciencia, a enxeñeira de Camiños, Canais e Portos e, investigadora do Centro de Innovación Tecnolóxica en Edificación e Enxeñería Civil (CITEEC ), Gemma López Rojo, veu hoxe impartir unha conferencia ao alumnado de 1º de Bacharelato.
Comezou a súa charla contando a súa experiencia persoal e lembrando os referentes femininos que lle axudaron a chegar a onde está; a continuación centrouse no seu campo de investigación: o mundo formigón e da construción sostible.
Sabiades que o formigón é o material máis empregado no mundo despois da auga? Pois si, de aí a importancia de realizar estudos para obter formigón de calidade que non contamine. A científica explicou como crear formigóns seguros a través da reciclaxe, entre outros, de construcións e demolicións, de determinados residuos industriais, das caixas de poliespan nas que se transporta o peixe fresco ou das cunchas de mexillóns -lembremos que Galicia produce unhas 250.000 toneladas ao ano-.
Á vez que amosaba fotos dos distintos formigóns obtidos, sinalaba as diferentes propiedades que presentaban segundo os compoñentes utilizados e, mesmo nos sorprendeu cunha foto dunha pequena construción realizada con formigón que contiña cunchas de mexillóns.
Como sinalou a investigadora é necesario conseguir un xeito de vida sustentable, aquel que permita cubrir as nosas necesidades sen prexudicar ás xeracións que veñen atrás. Por iso hai que seguir investigando na procura de novos recursos reciclando os residuos para seguir producindo nun sistema de economía circular.
Resultou unha charla moi interesante, sorprendente, pedagóxica e que nos permitiu abrir novos horizontes no proxecto de reciclaxe que estamos a desenvolver dende o Club de Ciencia.
NOVA VIDA AO PAPEL DE PERIÓDICO!
Na última xuntanza elaboraramos láminas de papel reciclado e... hoxe quixemos seguir a traballar con papel de periódico- unha vez lido é un residuo- para darlle unha nova vida! Decantámonos por crear lapiseiros personalizados para o que tamén precisamos bricks, cola branca, pinturas e, por suposto, a creatividade de cada un/unha dos alumnos e alumnas.
Como non nos deu tempo de rematar, ensinarémosvos as nosas creacións artísticas cando as finalicemos na seguinte xuntanza, o día 14 de febreiro!
O alumnado de 2º de BAC gozou na tarde de hoxe da conferencia Os segredos da Intelixencia Artificial Responsable, Accesible e Centrada nas persoas, unha grata e amena posta en común, que nos achegou ao mundo da IA (Intelixencia Artificial). Defenderon como o campo que estuda a creación de sistemas capaces de resolver problemas de forma autónoma (imitando a intelixencia humana) con aspectos tan interesantes coma os “sesgos na aprendizaxe automática (corpus), puxeron algúns exemplos en “visión artificial (con ALEXNET)” ou xogos con “Citius invaders”.
A verdade é que nos soubo
a pouco e quedamos con ganas de saber e aprender moito máis sobre o tema. En palabras de Fran, un dos asistentes: A mellor charla que tivemos!
A conferencia foi impartida por Alberto Bugarín Diz, catedrático de Ciencias da Computación e Intelixencia Artificial e investigador do CiTIUS (Centro Singular de Investigación en Tecnoloxía Intelixentes); por José María Alonso Moral, enxeñeiro Superior en Telecomunicacións pola UPM e tamén investigador no CiTIUS-USC, e por Alejandro Catalá Bolós, profesor-axudante Doutor, e forma parte do Programa A ponte entre o ensino medio e a universidade da Universidade de Santiago de Compostela.
A nosa comunicade podería ter no curso 2022-2023: o Grao de Intelixencia Artificial e pasaría a ser unha das poucas que o imparta en España -a USC ten deseñado o proxecto dende 2020- e se constituiría nunha das titulacións máis importantes para o presente e futuro da sociedade. Por iso dende o Club de Ciencias queremos abrirlles os horizontes profesionais a rapaces e rapazas que están a piques de iniciar os seus estudos universitarios.
TALLER DE RECICLAXE DE PAPEL DE PERIÓDICO
Hoxe tivemos unha nova reunión do Club de Ciencia na que realizamos un taller de reciclaxe de papel de periódico. Antes de empezar lembramos os 3 R: Reducir, reutilizar e reciclar, tres conceptos moi importantes para coidar a nosa contorna, e a continuación puxémonos mans á obra!
Con antelación xa puxeramos a remollo anacos de papel durante 24 horas co obxectivo de ter a formada a polpa de papel coa que teriamos que traballar. Empezamos, pois, botándolle unha cantidade adecuada de auga e triturándoa co batedor. A continuación coa axuda dunha criba recollemos unha capa da polpa, démoslle forma cun rodete e colocouse sobre pano para o seu secado.
Teremos que esperar a que estea a punto, pero xa lle estamos dando voltas á cabeza para darlle un uso orixinal ao noso papel reciclado.
