Segunda reunión segundo trimestre

 

 ESTUDIO DO FENÓMENOS DE DIFRACCIÓN

O luns, 17 de marzo, o alumnado do Club de Ciencia de 2º e 3º ESO, participou nun taller onde puideron experimentar co fenómeno de difracción da luz.

Entre os diversos experimentos que se puideron facer coa axuda dun láser destacamos: comprobación da lei de Snell, observación do fenómeno da difracción da luz, creación de patróns de interferencia, comprobación do Principio de Huygens e experimento da dobre grella. Tamén puideron comprender o funcionamento dos láseres e como se pode determinar a separación entre pistas dun CD.

Segunda reunión segundo trimestre

 

 CIRCUITOS CON PLASTILINA CONDUTORA

O luns 17 de marzo, o alumnado do Club de Ciencia de 1º ESO participou nun taller que consistía en elaborar plastilina condutora e illante coa que posteriormente debían elaborar un circuito empregando unhas pilas e uns led de cores. Primeiro elaboraron a plastilina con materias cotiás (fariña, auga, zume de limón, sal, aceite de cociña e colorante). Para que a plastilina sexa condutora precisa que na súa composición haxa sal mentres que se non se quere condutora o que se lle ten que engadir é azucre.

Unha vez feita a plastilina había que formar un circuito co que se pretende encender uns leds (en serie, en en paralelo, ....) a creatividade do alumnado puidose comprobar cos circuitos elaborados que se poden observar nas seguintes fotografías.

Segunda reunión segundo trimestre

 

 EXPERIENCIAS DE PAPIROFLEXIA: TENSIÓN SUPERFICIAL E CAPILARIDADE 

O luns, 17de marzo, o alumnado do Club de Ciencia de 4º ESO e 1º e 2º Bacharelato participou nun obradoiro de papiroflexia no que se fixeron diferentes experimentos. O primeiro con flores e estrelas de papel puideron aprender máis sobre a capilaridade que presenta as fibras do papel e como se van abrindo os petalos que se encontran pregados polo efecto da capilaridade. O seguinte experimento consistiu na creación dun foguete que fixeron voar polo efecto da presión do aire. para rematar estas experiencias tan interesantes e motivadoras, fixeron un barco de papel e puideron experimento coa tensión superficial da auga e como cunha gota de xabón rompe esa tensión liberando o barco que empeza a moverse só pola auga.

Ocultadas pero elementais: a diversidade na historia da física

        O pasado 8 de marzo conmemoramos o Día Internacional da Muller e no Club de Ciencia sempre adoitamos nesta data lembrar e destacar a importancia do papel decisivo que ao longo do tempo desenvolveron as mulleres na Comunidade Científica. Por iso hoxe, xoves 13 de marzo, o alumnado de 3ºESO e o de 1º e 2º FPB tiveron a oportunidade de participar nunha charla impartida por  Cristina López Iribarnegaray, investigadora do IGFAE.

     Na ponencia, Ocultadas pero elementais: a diversidade na historia da física, deu a coñecer mulleres que desenvolveron a súa actividade no ámbito científico e, non sempre foron premiadas polo seu traballo nin visibilizadas na sociedade. Marie Sklodowska Curie, Lise Meitner, Chien-Shiung Lou ou Marie Goeppert-Mayer foron algunhas das que se destacou o seu traballo no percorrido cronolóxico que fixo a relatora dende os tempos das escolas pitágoricas ata os nosos días.

    Comentou que a discriminación das mulleres se producía polo xénero, pero tamén nos informou do traballo cientifico de homes que pola súa condición sexual non foi recoñecido, coma Alan Turing ou Frank Kameny ata que a Historia os colocou no lugar que merecían. 

    Estas charlas son necesarias para conseguir unha sociedade máis igualitaria en todos os ámbitos, ademais de permitirlle ao noso alumnado coñecer a historia dos descubrimentos científicos, tanto os realizados por mulleres como por homes.

 

MASTERCLASS FÍSICA DE PARTÍCULAS NO IGFAE

O xoves 6 de marzo, Daniel Díaz, Claudia Lema, Desireé Vázquez e Miguel Vázquez, alumnos e alumnas de 2º Bacharelato, participaron na Masterclass de Física de Partículas organizada polo IGFAE (Instituto Galego de Física de Altas Enerxías).

               As actividades organizadas para esta xornada comezaron cunhas charlas, a primeira de física de partículas e a segunda sobre os detectores empregados para identificar as partículas elementais. Na primeira e dun xeito moi visual, puidemos viaxar dende as partículas máis grandes como as galaxias ata as máis pequenas que inclúen non só os átomos senón tamén as partículas subatómicas como o protón, o electrón e o neutrón, incluíndo outras partículas elementais como os quarks, os bosóns… Unha vez rematada a primeira charla puidemos afondar sobre as partes que constitúen os detectores, en concreto o LHcB (Large hadron Collider beauty). Empregando os aceleradores de partículas unido o detector adecuado pódese identificar as partículas fundamentais. Mediante os datos de carga e masa dos sinais obtidos co detector chegamos a distinguir entre: electrón, fotón, Hadrón, muón ou neutrino.

Na sesión práctica que se desenvolveu coa axuda dun ordenador conseguimos realizar a identificación de mesón Dº e medida da vida media. Esta xornada foi moi interesante xa que traballamos como verdadeiros científicos.

Para rematar a xornada, compartimos os nosos datos con outros estudantes e científicos a través dunha videoconferencia co CERN. 

Visibilizando científicas no Día da Muller Traballadora

 

Hoxe, 10 de marzo, o alumnado de 2º FPB realizou co gallo da conmemoración do Día da Muller Traballadora, unha actividade na que lembraron 8 científicas relevantes: Rosalind Franklin, Jocelyn Bell, Hedy Lamar, Ángeles Alvariño, Margarita Salas e Marie Curie. 

Comezaron montando uns crebacabezas que se elaboraran con anterioridade a partir dunha fotografía e se prepararan coa cortadora láser. Unha vez montados os crebacabezas tiveron que identificar a científica que reproducían e posteriormente profundizar na súa traxectoria profesional. Para rematar fixeron unha exposición ante o resto da clase contando aspectos relevantes da vida profesional destas científicas destacadas .

Foi unha actividade moi motivadora e interesante para o alumnado.

  

 

DÁLLE UNHA VOLTA AO TEU CONSUMO

Pílula informativa mes de marzo:

    Neste mes de marzo a pírula informativa que queremos compartir para continuar coa nosa reflexión sobre o consumo responsable de produtos frescos e de proximidade é a seguinte.

    Mellor sabor e calidade nutricional: Os alimentos locais adoitan estar no seu punto óptimo de madureza o que se traduce nun maior sabor e calidade nutricional.